Pengidup Lansaka Runding

Hooha, baca tok dulu,

lawa mih dunya kemaia dia,
sema ko jaku Janang Ensiring,
Dunya tu Panggau Pengelulu,
kin kia ngembuan daya kediri empu.

bisi sehari nya aku bejalai,
ngelawa palan urang rindu bejalai lemai,
Taman Sahabat penatai diambat,
ngumban ati aku badu beraie.

bula mega tuchum tu enda reraie,
buta mata tu nyema diri nadai nyida,
umur berubah penemu betambah,
runding ngejang dunya mansang.

runsing pikir ngenang dunya,
kemaiatu bebela landik udu maju,
pemansang meransang nuju pengidup,
diri mega ngiga jalai beridup.

ba palan simpang pengidup,
kala diri tu teterap lalu tetungkam,
labuh senentang penguji ngelungkup,
ngelaban dalam petang tegayam.

tanya melilih lebih ari saut,
sesedan diri deka nyaut,
kelalu mayuh leka nyeruga nanya,
ka nemu kuing ke patut endur bedaya.

pemayuh runding merinsa ati,
ka lebu mina angat sekali negu,
ka untung mina sekarung,
tang rugi lebih seguni.

dini ati enda tasah,
didi ati enda ngeransi,
tunga kiba ga salah,
tunga kana ngasuh bebadi.

ingin ati kuing kiba,
utai merindang ngasuh tebelenga,
gelumbang penguji mayuh nguji,
meseti dikembuan kering ati.

bintang berintai ba langit mingkai,
pegari manchar ayuk aku bejalai,
nujah jalai penuh duri munti,
pajak bakanya ngemudi diri.

simpang pengidup mayuh cabang,
bisi paya bisi tebiang,
iya ka paya dulu merinsa,
dudi baru teulihka penyenang,
iya ka tebiang nya dulu lantang,
tang nesal ba hari ila.

ah dih tusut mih runding,
buai mih ati kaju kaja,
nempuh penguji datai nuntung,
bepenemu, pintar idup, diri menyana.

Ngelansa Buah Runding :
buah runding dipeda ari karang kaban sebuat,
tak rindu ninga munyi tusun leka betuat,
kaban digela Fabian Halley Pata,
urang Saratok jelan gamal tampak rita.

Nemu enda, nemu enda meh aku enggau leka jako kaban aku tok. Nangkap enda nangkap enda meh aku. Tang rindu ati maca. Endar semampai nemuai ngagai blog kaban aku tok aku, rindu macha leko jaku ia. Engka laban penatai menua nadai jauh, bunyi pan agi sama. Tau endar gak gaga kah leka lagu, ;).

Tok blog kaban aku nya, Erwinner Elsy Entring ,

Peturun Apai BuahKenang,
nadai pengelandik bejawang,
ukai mega manang begaga ka sakang,
mina leka aku ditela dikarang,
ka pengingat bekau tudah nyingkang.

Nya pantun ia, semampai buah leka jako ia, ba pengujung blog ia. Ba, nama kita bisi ari ngelawa blog ia. hooha ....

regards,