Microwave

Dua ari tok aku udah dugau-dugau nunga berita ba tb. Lama udah nadai meda berita, enti meda, suma meda pansa aja mua tb. Malam kemari enggau malam tok tadi, peda aku abis. Nyeah lapo, amat nadai menuku meh berita kitai. Nama ukai politik, murtad, ukai murtad politik. Nadai berita ka menyana agik ulih di bantai?

Indah enda baka gerama, ngajar anak bejalai meh sida ka tuai nya. Bejaku rah-rah, bejai ka pangan diri. Lagi tunda bala anak, bala ka biak, lalu nyalah kah urang bukai. Nama guna rah-rah, bejai kah pengarap bukai. Pengarap nuan manah? Aku nama utai hal hal ketu, amat emosi gak aku. Laban, sekumbang aku kah idup, nadai udah meda orang ka murtad tok aku. Bansa kitai ka masuk pengarap sida gak mayuh agik. Nama enda utai ka di kering kah sida ia tok?

Ukai jako bula jako sengapa. Enti di itung, Bala kami tok mayuh udah masuk pengarap sida. Ari bala sepiak inek Krian aku. Sigi nyadi bansa sida, nadai gak aku nemu, sida ka murtad. Paling semak, menyadi aku empu. Nadai meh kami tok ngasuh murtad. Agik meh kami nyadi kah menyadi, nadai kami muai ia.

Nama kebuah sida ka endar ngaga hal tu, dibangkit dijadikah isu? Nadai hal bukai ulih ditegak sida, kena mancing undi, kelimpah ari isu tok? Nya kadang kadang, nyau berunding 10 kali ka enggau orang ngundi. Nadai nyadi apa-apa. Nya inek aku, ari zaman jipun suba, lalu brooke, masuk Malaysia, sigi nadai enda enggau orang ngundi. Bisi pemansang, jalai, karan, ai sigi apin datai ke menua kami Krian din. Kemaya ka datai? Setiap kali pengawa bepilih, nya aja ka digaga. Arap kah tahun tok bisi.

Udah ka pengawa bepilih tok ila, anang aja minyak niki, rega barang niki. Nti majak niki, sigi nadai ulih Idup meh bansa kitai. Enti tak mina ngarap kah rega getah, nadai ujung. Enti nemu nyimpan engka pama gak agi. Enti endar nadai mayuh, nadai nemu cara ka nyimpan gak. Besampi meh kitai, awak kah petara nyangkung. Enti orang jai, nyiping kitai, nya antara ia enggau petara aja agik.

Enti minyak niki, mati meh bansa kitai. Sida kah bisi subsidi minyak untung meh. Bansa kitai, mina tak subsidi baja, endar tak ari jemah kelia, nadai pemujur peda aku. Nadai kini kini gak tunga subsidi baja nya peda aku. Aku pan enda entu nemu nama kebuah, laban aku tok, sigi enda nemu pasal orang ka betanam tok. Tang subsidi baja tok, mina mina ngemenuh kah ruai aja. Ujung-ujung embap, basah, lalu tekering. Ni ulih kena agik. Ukai nya tiap ari kah maja.

Agik pegai BN, kami ai krian, bisi beri orang manuk perintah. "manuk nyarok" beri bala. Petungal ku, ka amat ketawa, nusui cerita ia ka enggau orang ngambi manuk nyarok nya. Manuk amat mayuh beri, tang enda tan. Sema beri ia 20 iku, manah ulih besai, ka dempa bisi 3-4 iku. Ka bukai mayuh agik mati agik mit. Nya sema kah leka lagu, "10 ekor anak ayam" nya.  Udahlah rua amat baja. Kuat makai, tang besai lubah amat. Rezeki meh nya.

Udah kah pegai perintah baru, nadai udah nemu pemansang menua diri. Apoo, deh lama amat udah aku nadai pulai. Naka kah pulai tahun baru suba, tok pulai gawai ila. Alang-alang ka pulai meua. Enti bepilih sebedau gawai, runding dulu. Lembau ka pulai, enti tak mekang mekang aribulan. Pulai ila baru ulih meda pemansang dibai perintah baru. Laban maya ka bepilih suba, mayuh gak janji. Arap kah janjinya datai magang meh.

haidehh

regards,
Ben

On Friday

Hello People,

Tumu aku dani pagi tok, tajapan cuti. Nyau udah teleba mata. Udah jam kah dani, sigi lalu tedani aku maya jam nya. Nya kadang kadang, enda nganti alarm ku bebunyi, sigi udah dani meh aku.

Happy Friday people!

Regards,
Ben

Thursday

Pagila cuti, kenu ko jako. Tang sigi cuti gak aku, kapa aku nurun. Mak enggau dadi bisi datai ari Saratok. Tambah mega, pagila dadi ka becheck ngagai Normah. Nya kebuah aku ngambi cuti, ukai tak cuti ngapa. Kumbai tak ka ndar gak aku tok cuti, ukai nya bisi pengawa nya ditu enti cuti. Enti cuti lu pulai menua, nya lain gak cherita.

Seminggu tok udah aku minta cuti nya, ari lima nyin kemari. Tadi aku ngechek, lalu gak bedau kena sign. Enda ibuh aku nyebut dini endur stuck. Parai kena baca, kena ukum lagi, enti ukum kena tiki pangkat enda gak ngawa. Nya kada enda lalu buai. Enda gak telanjai tubuh laban nya.

Laban kah agik gawa, makai gaji baruh orang, susah endar. Ka kitai complaint lagi susah, diri empu susah. Kitai enda complaint lagi, diri empu gak kena susah. Nyau dua dua susah. Nyamai tak susah aja. Enda bebunyi meh tok. Tat kah aja, nadai ulih terebai terebai baka suba.

Suba maya enda rindu, nyeah lapa, sua kah surat. Diatok enda ulih agi, susah nadai duit deh. Udah nyepi maya kah badu enggau Petra suba, akaii deh, sekumbang kah nadai pengawa nya dadi sigi enda meri duit. "Ka beduit gawa ko ia". Endar amat gak ko ia, nya tulih kah pengawa tok, tat kah aja meh dia, pedis nyamai, laban beguna kah duit.

Aku enda nemu enggau urang betangguh tangguh kah pengawa. Nama bisi, naka kah gaga. Enda tembu, tampung ka ari siti. Nya kadang kadang, nama aku meda pengawa orang bukai enda nemu tembu, lain gak ati enggau runding aku meda. "Ia tok enda gawa kini?". Minta ampun gak aku bala pemacha, enti jako tok ngacau ati kita. Tok runding aku aja. Laban kitai gawa, endar bisi "scope of work" diri empu, enda patut enda tetembu ka pengawa kitai empu. Gaga magang "main job" kitai nya dulu, baru kitai ngaga pengawa sampingan ka bukai.

Nya meh kitai mensia, buk sama celup, ati kitai ukainya sebaka. Enti sebaka, lantang dunya. Dengki siti gik hal. Kitai enda tau dengki ka orang. Nama ka lebih, kitai bebendar, anang bedengki, ngiga hal ngelabuh kah orang. Aku enda gak entu kisah kah nya, nitih ka dajar dadi, "nadai ngawa nama orang bisi begedi, dengki kah kitai, petara nemu mansi kitai". Sigi nya kingat aku.

Nyau mucau bunyi aku malam tok. Enggai kah nyau panjai lagi. Susah lagi.

Regards,
Ben

Changed

Akai enda sabar amat asai ati aku deh, hari empat ila datai mak enggau dadi. Tajapan enda lama, naka ngagai ari minggu. Apoo, lama amat asai udah sepi aku, nadai betemu. Nyau enda betah asai. Nya mak selalu madah, enti udah bebini ila, kada agik enda betah kah kitai, heheh

Nama pengawa bala kita? Lama gak aku udah nadai nemuai kitu, pun bulan sarinya, nyea nyau ka semak sebulan. Nyau kiruh ati diri, nyau enda berasai abis, apus gak bulan. Masuk bulan 4, abis, masuk bulan 5, nyau tetengut gak ati ka kemisi, ka pulai Gawai. Nyeah lapa.

Kiruh diri gak sebulan tok, kia kia, nya nyau enda berasai abis gak bulan. Pun bulan sarinya, enggau Team Kemahiran ke Lubuk Antu. Apoo, lama amat udah aku enda kia, naka agik menyadi tuai aku kah gawa dia, udah ka nyau pindah Saratok, tak nadai agik kia kami. Amat mansang meh udah Lubuk Antu. Nyau majak nambah kedai nunga ke pasar baru, nyau bisi kah 5, 6 lumpung pasar baru. Kami kah pulai lemai, kira pukul 530 kenya, pama diri deh, agik rami gak pasar sida. Suba sunyi amat asai.

Tadi talipun ke rumah, panjai berandau enggau mak. Kemari aku called, ndai nyambut, nemu seduai ia dadi kulu, ngabas inek. Inek sakit, tang diatok udah gerai, sakit tuai ia nya meh. Sakit rengak, apoo, amat lama gak udah aku enda betemu enggau inek. Pulai tahun baru sarinya, nadai gak betemu, laban ia enggau menyadi indai ku ke Kuching. Aku pulai, sida ke Kuching, nyau selisih, tang nadai gak bepansa. Arap kah inek nadai apa nama meh. Udah diatok angat amat, ia endar boleh tahan gak deh inek aku nya, enti bejalai ba babas, sigi alah aku tok.

Nama tok dulu, ila kitai betemu baru. Aku diatok nyau majak lembau bekacit ka kamera, nyau nyau kurang begambar, nyau kurang cerita ka tusui. Ila aku nguji rajin baru beambi kah gambar.

regards,
Ben

Ok last, sekian

Asai kah agi sama meda tubuh diri depan cermin. Nama ngerunding umur, berasai amat udah tuai. Nama enda utai udah gaga? Nadai udah ngasai, nadai udah megai. Tak agik asai sama, setahun kka udah, ngau masuk kah tahun tok. Ngajih kah tahun tok bisi penampak, bisi penerang ngagai pegidup.

Bejanji aku, Asai kah udah cukup kena aku bejegau sebelah dunyo siber tok. Cukup meh kah udah. Tiap kali aku gak nyapa, tiap kali gak aku betanya rita bala kaban dia, bisi enda sida ngerunding aku kini? Nyelai munyi runding. Nemu lelak gak aku, ukai ngujung kah teleba. Bepun kah saritok, ka ngurang kah diri enggau facebook, blog tok duji aku rembus selalu agik, laban tok sigi jadi kah diary aku. Kenya mega twitter aku, ka nguji ngurang kah diri, betaip, besend kah utai dia.

Enda ko Dadi, "umur kitai majak tuai, anang enda ngubah ulah enggau runding diri nitih ka umur. Kitai ukai majak biak, majak tuai. Enti kitai majak tuai, majak beli, nadai penyadi".

Enda berasai, udah bulan tiga kah diatok, Asai kah baru ensanus tahun baru. Pejam enchelak, pejam enchelak bulan tiga. Puji ngagai petara, udah nyaga kami sebilik, kaban belayan, chelap lindap tahun tok. Hari 5 sarinya bulih bala baru kami, petungal baru, tunggal biak, ari sepiak mak ku. Menyadi biak ia kah laki, ka jadi enggau orang Lubuk Antu. Betambah, mayuh bala kami Gawai tahun tok, terima kasih Tuhan. Bisi ari ila aku post gambar ia ditu, sarinya enda ingat save, laban gambar ba handphone dadi. Sida ka pulai sarinya, enda ingat pindah kah aku.

mupuk enda lama, ila betemu baru

regards,
Ben